அரசாங்கத்தின் குறைபாடுள்ள கொள்கைகள் காரணமாக விவசாயிகள் மீண்டும் தெருக்களில் போராடும் நிலை ஏற்பட்டுள்ளது என்று  ஜேவிபி கட்சியின் முன்னாள் தலைவர் ரோஹண விஜேவீரவின் மகனும் ‘இரண்டாம் தலைமுறை’ கட்சியின் தலைவருமான உவிந்து விஜேவீர தெரிவித்துள்ளார்.

இன்றைய தினம் (14) உவிந்து விஜேவீர  கொழும்பில் நடத்தப்பட்ட ஊடக சந்திப்பில் கலந்துகொண்டு, இலங்கையின் விவசாயிகள் எதிர்கொள்ளும் கடும் நெருக்கடிகள் மற்றும் அரசின் செயற்பாடுகள் குறித்து கடும் விமர்சனங்களை முன்வைத்தபோதே மேற்கண்டவாறு குறிப்பிட்டார்.

இதன்போது அவர், அரசாங்கத்தின் குறைபாடுள்ள கொள்கைகள் காரணமாக விவசாயிகள் மீண்டும் தெருக்களில் போராடும் நிலை ஏற்பட்டுள்ளது என்றார்.

மேலும் அவர், உருளைக்கிழங்கு மற்றும் வெங்காய விவசாயிகள் சமீபத்தில் மேற்கொண்ட போராட்டத்தை சுட்டிக்காட்டினார்.

இந்த நெருக்கடிக்கு அரசின் தவறான நடவடிக்கைகளே காரணம் என்று அவர் குற்றம் சாட்டினார்.

மேலும், அரசாங்கம் உண்மையான விவசாயிகளுடன் பேச்சுவார்த்தை நடத்தாமல், வேறு சில குழுக்களுடன் மட்டுமே பேச்சுவார்த்தை நடத்துவதாக குறிப்பிட்டார்.

விவசாயிகள் எதிர்கொள்ளும் சந்தைப் பிரச்சினைகள் குறித்து பேசிய அவர், உருளைக்கிழங்கு விலை முரண்பாட்டை எடுத்துக்காட்டினார்.

விவசாய அமைச்சர் உருளைக்கிழங்கை கிலோவுக்கு ரூ.200க்கு வாங்குவதாக உறுதியளித்தாலும், சந்தையில் அது ரூ.100க்கும் குறைவாகவே வாங்கப்படுகிறது. ஆனால், நுகர்வோர் ரூ.300 செலுத்தவேண்டியுள்ளது என்றார். இத்தகைய பிரச்சினைகளுக்கு அறிவியல் ரீதியான தீர்வு தேவை என்று வலியுறுத்தினார்.

“உயர்தரத் தக்காளி (அடத் தக்காளி) அறுவடை அதிகரித்துள்ளது. ஆனால், அதனை விற்க முடியவில்லை” என்று தெரிவித்தார். உருளைக்கிழங்கு மற்றும் வெங்காயம் போன்ற பொருட்களின் வெளிநாட்டு இறக்குமதியே நாட்டு விவசாயிகளுக்கு சந்தையில் இடமில்லாமல் செய்வதாகக் கூறினார்.

இலங்கையில் பழ இறக்குமதி குறித்து கடும் விமர்சனம் செய்த அவர், “இலங்கையில் ஆப்பிள், தோடம்பழம் (ஒரெஞ்ச்) பயிரிட முடியும்போது, அவை வெளிநாட்டிலிருந்து இறக்குமதி செய்யப்படுவது ஏன்?” என்று கேள்வி எழுப்பினார்.

நாட்டின் உணவுப் பாதுகாப்பை உறுதிப்படுத்த உள்நாட்டு விவசாயிகளைப் பாதுகாக்க வேண்டியது அவசியம் என்றார்.

இதற்கான தீர்வாக, இறக்குமதி செய்யப்படும் உணவுப் பொருட்களுக்கு விதிக்கப்படும் வரியைப் பயன்படுத்தி, “உணவுப் பாதுகாப்பு நிதி” ஒன்றை உருவாக்க அரசுக்கு பரிந்துரைத்தார். ஆனால், “இன்று, கிலோ கணக்கில் தக்காளியை விற்க முடியாமல் இருக்கிறது” என்று நடைமுறைச் சிக்கலைச் சுட்டிக்காட்டினார்.

21ஆம் திகதி நடைபெறவுள்ள பேரணி குறித்து ஊடகவியலாளர்கள் கேட்ட கேள்விகளுக்கு பதிலளித்த அவர், தமது கட்சி அப்பேரணியில் பங்கேற்காது என்பதை மீண்டும் உறுதிப்படுத்தினார்.

“எதிர்க்கட்சியில் இருந்தும் மக்கள் பிரச்சினைகளுக்காகப் போராட மாட்டார்கள். அவர்கள் தங்கள் சொந்த இலக்குகளுக்காக மட்டுமே 21ஆம் திகதி பேரணி நடத்தப் போகிறார்கள்” என்று கடும் விமர்சனம் முன்வைத்தார்.

மேலும், இந்த நாட்டுக்கு ஒரு புதிய எதிர்க்கட்சியை உருவாக்கவேண்டிய நிலை ஏற்பட்டுள்ளது என்று கூறி, தற்போதைய எதிர்க்கட்சியின் செயற்பாடுகளில் தமக்குள்ள அதிருப்தியை வெளிப்படுத்தினார்.