தலைமன்னார் கடற்பரப்பில் வைத்து நேற்று சனிக்கிழமை (28) இரவு கைது செய்யப்பட்ட 23 இந்திய மீனவர்களையும் மேலதிக சட்ட நடவடிக்கைகளுக்காக இன்று ஞாயிற்றுக்கிழமை (29) மாலை மன்னார் கடற்றொழில் நீரியல் வள திணைக்கள அதிகாரிகளிடம் தலைமன்னார் கடற்படையினர் ஒப்படைத்துள்ளனர்.
இன்று தலைமன்னார் கடற்படை முகாமில் மலேரியா பரிசோதனை மேற்கொண்ட பின்னரே, மாலை வேளையில் மன்னார் கடற்றொழில் நீரியல் வள திணைக்கள அதிகாரிகளிடம் இந்த 23 பேரும் ஒப்படைக்கப்பட்டுள்ளனர்.
அதனையடுத்து, திணைக்கள அதிகாரிகளின் விசாரணைகளுக்குப் பின்னர் 23 மீனவர்களும் மன்னார் நீதவான் நீதிமன்றத்தில் ஆஜர்ப்படுத்தப்படவுள்ளனர்.
இலங்கை கடற்பரப்பில் சீன உளவு கப்பல் நங்கூரமிடப்பட்டு நிறுத்தப்பட்டுள்ளதையடுத்து, நேற்று (28) மாலையில் இருந்து இலங்கை கடற்படையினர் இலங்கையின் பல்வேறு கடல் பகுதிகளில் தீவிர கண்காணிப்பில் ஈடுபட்டு வருகின்றனர்.
இந்நிலையில், எல்லை தாண்டி மீன்பிடித்ததாக தலைமன்னார் கடற்பரப்பில் வைத்து நேற்றிரவு தமிழ்நாட்டின் இராமநாதபுரம் மாவட்டம், ராமேஸ்வரத்தை சேர்ந்த 23 மீனவர்களையும் மூன்று ரோலர் படகுகளையும் கடற்படையினர் கைது செய்து தலைமன்னார் கடற்படை முகாமுக்கு அழைத்துச் சென்றமை குறிப்பிடத்தக்கது.
