எப்ஸ்டீன் ஃபைல்ஸ்: ரகசிய ஆவணங்களும், வலுக்கும் ‘பாலியல் பயங்கரம்’ சர்ச்சையும்!

யார் இந்த எப்ஸ்டீன்? அமெரிக்காவில் ஒரு சாதாரண பள்ளி ஆசிரியராக தனது வாழ்க்கையைத் தொடங்கியவர்தான் இந்த ஜெஃப்ரி எப்ஸ்டீன். பின்னாளில் ஆள்கடத்தலில் ஈடுபட்டு மிகப் பெரிய பாலியல் இடைத்தரகரானார். கடந்த 2015-ஆம் ஆண்டு வர்ஜீனியா கிஃபர் என்ற அமெரிக்க பெண், பிரிட்டனைச் சேர்ந்த கிஷ்லெய்ன் மேக்ஸ்வெல் என்பவர் மீது ஒரு வழக்கு தொடர்ந்தார். அதில் ஜெஃப்ரி எப்ஸ்டீன் என்ற பாலியல் தொழில் இடைத்தரகருடன் சேர்ந்து கிஷ்லெய்ன் பாலியல் தொழிலுக்காக ஆள் கடத்தலில் ஈடுபட்டார் என்று கூறியிருந்தார். தானும் அவ்வாறாக பாலியல் தொழிலுக்கு தள்ளப்பட்டதாகவும் அவர் கூறியிருந்தார். மேலும், 1999 முதல் 2022 வரை பாலுறவில் ஈடுபடும் வயதை எட்டாத தன்னை பலருடனும் கட்டாயப்படுத்தி உறவில் ஈடுபட வைத்ததாகவும் அவர் குற்றஞ்சாட்டியிருந்தார். இந்தக் குற்றச்சாட்டு தான் எப்ஸ்டீனை சிறையில் தள்ளியது. அப்போதே பல பிரபலங்களின் பெயரும் அடிபட்டது.

இந்நிலையில், சிறையில் அடைக்கப்பட்டிருந்த எப்ஸ்டீன், கடந்த 2019-ல் தற்கொலை செய்து கொண்டார். இதையடுத்து அவர் மீதான வழக்குகள் கைவிடப்பட்டன. எனினும், இந்த வழக்கில் தொடர்புடைய அனைத்து ஃபைல்களையும் வெளியிடுமாறு ஜனநாயக மற்றும் குடியரசு கட்சியினர் கோரிக்கை வைத்தனர். இதையடுத்து, அந்த ஃபைல்களை வெளியிடும் மசோதாவுக்கு நாடாளுமன்றம் ஒப்புதல் வழங்கியது. 30 லட்சம் பக்கங்கள்... ஜெஃப்ரி எப்ஸ்டீன் தொடர்பான 30 லட்சம் பக்கங்கள் கொண்ட ரகசிய ஆவணங்கள் வெளியிடப்பட்டுள்ளன. இதில் இடம்பெற்றுள்ள சில பிரபலங்கள், ஜெஃப்ரியை தங்களுக்குத் தெரியாது என்று கூறி வந்தனர். ஆனால், மின்னஞ்சல்கள், கடிதங்கள் மற்றும் பயணப் பதிவுகள் உள்ளிட்டவை அடங்கிய இந்தப் புதிய ஃபைல்கள், எப்ஸ்டீன் தண்டிக்கப்பட்ட பிறகும் பலருடன் தொடர்பில் இருந்ததை உறுதிப்படுத்துகின்றன. இதில் தொழிலதிபர் எலான் மஸ்க், அமெரிக்க வர்த்தக அமைச்சர் ஹோவர்ட் லுட்னிக் மற்றும் பிரிட்டன் தொழிலதிபர் ரிச்சர்ட் பிரான்சன், இளவரசர் ஆண்ட்ரூ, அமெரிக்க முன்னாள் அதிபர் பில் கிளின்டன் உள்ளிட்டோரின் பெயர்கள் இடம்பெற்றுள்ளன. கசியும் இ மெயில்கள்: எப்ஸ்டீனுடன் எலான் மஸ்க் சில மின்னஞ்சல்களைப் பரிமாறிக்கொண்டதை ஆவணங்கள் காட்டுகின்றன. 2012-ல் ஒரு மின்னஞ்சலில், "உன் தீவில் எந்த நாளில் மிகவும் உற்சாகமான பார்ட்டி நடக்கும்?" என்று மஸ்க் கேட்டதாகக் கூறப்படுகிறது. ஆனால், தான் ஒருபோதும் அந்தத் தீவுக்குச் செல்லவில்லை என்றும், எப்ஸ்டீன் தன்னை அழைக்க முயன்றபோது மறுத்துவிட்டதாகவும் மஸ்க் சமூக வலைதளங்களில் விளக்கம் அளித்துள்ளார். எப்ஸ்டீனை 'அருவருப்பானவர்' என்று கூறிய அமெரிக்க வர்த்தக அமைச்சர் ஹோவர்ட் லுட்னிக், 2012-ல் தனது மனைவி மற்றும் குழந்தைகளுடன் எப்ஸ்டீனின் தீவுக்குச் செல்ல மின்னஞ்சல் மூலம் திட்டமிட்டது தெரியவந்துள்ளது. பிரிட்டன் கோடீஸ்வரரான ரிச்சர்ட் பிரான்சன், எப்ஸ்டீனுடன் கிண்டலாகப் பேசிக்கொண்ட மின்னஞ்சல்கள் கிடைத்துள்ளன. ஆனால் இது முற்றிலும் வணிகம் சார்ந்தது என்று அவரது குழுவினர் தெரிவித்துள்ளனர். இளவரசர் ஆண்ட்ரூ எப்ஸ்டீனை பக்கிங்ஹாம் அரண்மனைக்கு விருந்துக்கு அழைத்ததும், எப்ஸ்டீன் அவருக்கு ஒரு ரஷ்யப் பெண்ணை அறிமுகப்படுத்த முயன்றதும் தெரியவந்துள்ளது.