வாகனங்களை நிறுத்தி ஆவணங்கள் கோரும் சட்ட அதிகாரங்கள் குறித்து காவல் துறை விளக்கம்

வாகனங்களை வீதியில் நிறுத்துவதற்கும், ஓட்டுநர்களிடம் ஆவணங்களைக் கோருவதற்கும் பொலிஸ் உத்தியோகத்தர்களுக்கு வழங்கப்பட்டுள்ள சட்டப்பூர்வமான அதிகாரங்கள் குறித்து பொலிஸார் பொதுமக்களுக்குத் தெளிவுபடுத்தியுள்ளனர்.

இதன் முக்கிய அம்சங்கள் வருமாறு,

ஒரு வாகனத்தை நிறுத்துவதற்கான முதன்மை அதிகாரம் மோட்டார் போக்குவரத்துச் சட்டத்தின் 162-வது பிரிவின் கீழ் வழங்கப்பட்டுள்ளது.

இதன்படி சீருடையில் இருக்கும் ஒரு பொலிஸ் உத்தியோகத்தர் தனது கடமையைச் செய்யும்போது வழங்கும் வாய்மொழி உத்தரவுகள் அல்லது கை அசைவுகளுக்கு (Hand signals) அனைத்து ஓட்டுநர்களும் கீழ்ப்படிய வேண்டும்.

வாகனத்தை நிறுத்துதல், பின்னோக்கிச் செலுத்துதல் (Reverse), வேகத்தைக் குறைத்தல் அல்லது போக்குவரத்தைச் சீர்செய்ய வீதியின் ஒரு பக்கத்திற்கு ஒதுங்குதல் போன்ற கட்டளைகள் இதில் அடங்கும்.

போக்குவரத்துப் பிரிவு (Traffic Division) உத்தியோகத்தர்கள் மட்டுமன்றி, சீருடையில் இருக்கும் எந்தவொரு பொலிஸ் உத்தியோகத்தருக்கும் ஒரு வாகனத்தை நிறுத்தும் அதிகாரம் உண்டு.

பொலிஸ் கட்டளைச் சட்டத்தின்படி, குற்றங்களைத் தடுத்தல் மற்றும் குற்றவாளிகளைக் கண்டறிதல் ஆகிய பணிகள் அனைத்து உத்தியோகத்தர்களுக்கும் உரியது.

எனவே, ஏதேனும் விதிமீறல் நடந்ததாகச் சந்தேகித்தால், சீருடையில் உள்ள எந்தவொரு உத்தியோகத்தரும் ஓட்டுநர் உரிமம், அடையாள அட்டை (NIC) அல்லது காப்புறுதி ஆவணங்களைக் கோர முடியும்.

சட்டப்படி, ஒரு தனி பொலிஸ் உத்தியோகத்தர் ஒரு வாகனத்தை நிறுத்தி குற்றச்சாட்டுக்களை முன்வைக்க அனுமதி உண்டு.

மோட்டார் போக்குவரத்துச் சட்டத்தின்படி, ஒரு வாகனத்தை நிறுத்துவதற்கு சாட்சியாக இரண்டாவது உத்தியோகத்தர் ஒருவர் இருக்க வேண்டும் என்ற கட்டாயம் இல்லை.

எவ்வாறாயினும், பாதுகாப்பு மற்றும் சோதனைச் சாவடிகளில் முழுமையான கண்காணிப்பை உறுதி செய்வதற்காகவே பொதுவாக பொலிஸார் இருவராக பணியாற்றுகின்றனர்.

பொலிஸ் உத்தியோகத்தரின் சைகையைப் புறக்கணித்து வாகனத்தை நிறுத்தாமல் செல்வது தண்டனைக்குரிய குற்றமாகும்.

உத்தியோகத்தரின் கடமைக்கு இடையூறு விளைவிப்பது அல்லது கட்டளைகளை மீறுவது தற்போதைய விதிமுறைகளின்படி பாரிய அபராதங்களுக்கு அல்லது நீதிவான் நீதிமன்றத்தில் சட்ட நடவடிக்கைகளுக்கு வழிவகுக்கும்.