பிரேசிலில் மீண்டும் இடதுசாரி ஆட்சி!

பிரேசிலில் நடைபெற்ற ஜனாதிபதித் தேர்தலில் தற்போதைய இடதுசாரி ஜனாதிபதி லூயிஸ் இனாசியோ லூலா டா சில்வா வெற்றி பெற்று, நான்காவது முறையாக ஜனாதிபதியாகத் தெரிவாகியுள்ளார். அமெரிக்க ஜனாதிபதி டொனால்ட் டிரம்பின் அரசியல் அணுகுமுறையுடன் நெருக்கமாகக் கருதப்படும் வலதுசாரி வேட்பாளர் பிளாவியோ போல்சனாரோவைத் தோற்கடித்து லூலா இந்த வெற்றியைப் பெற்றுள்ளார்.

இலத்தீன் அமெரிக்காவின் மிகப்பெரிய பொருளாதார நாடான பிரேசிலில் இம் மாதம் 4 ஆம் திகதி முதலாவது கட்ட ஜனாதிபதித் தேர்தல் நடைபெற்றது. இதில் எந்தவொரு வேட்பாளரும் பெரும்பான்மை வாக்குகளைப் பெறாததைத் தொடர்ந்து, 25 ஆம் திகதி இரண்டாம் கட்ட வாக்குப்பதிவு நடைபெற்றது.

இந்தத் தேர்தலில் ஆளும் தொழிலாளர் கட்சியின் தலைவரும் தற்போதைய அதிபருமான லூலா டா சில்வாவுக்கும், முன்னாள் ஜனாதிபதி ஜெய்ர் போல்சனாரோவின் மகனும் வலதுசாரி அரசியல்வாதியுமான பிளாவியோ போல்சனாரோவுக்கும் இடையே கடும் போட்டி நிலவியது.

இறுதி தேர்தல் முடிவுகளின்படி, லூலா 51.79 சதவீத வாக்குகளைப் பெற்றுள்ளார். பிளாவியோ போல்சனாரோ 48.21 சதவீத வாக்குகளைப் பெற்றுத் தோல்வியடைந்துள்ளார்.

தேர்தல் பிரசாரத்தின்போது, அமெரிக்க ஜனாதிபதி டொனால்ட் டிரம்பின் நிர்வாகத்துடன் சிறந்த உடன்பாடுகளை ஏற்படுத்துவதாக பிளாவியோ போல்சனாரோ உறுதியளித்திருந்தார்.

மறுபுறம், பிரேசிலின் ஏற்றுமதிப் பொருட்களுக்கு அமெரிக்கா விதித்த வரிகள் உள்ளிட்ட அமெரிக்காவின் வர்த்தகக் கொள்கைகளை லூலா கடுமையாக விமர்சித்திருந்தார். பிரேசிலின் தேசிய இறையாண்மையைப் பாதுகாப்பதுடன், நாட்டின் பொருளாதார நலன்களுக்கு முன்னுரிமை அளிப்பதும் அவரது அரசியல் நிலைப்பாட்டில் முக்கிய இடம்பிடித்திருந்தது.

லூலாவின் வெற்றி, லத்தீன் அமெரிக்காவில் அமெரிக்க ஜனாதிபதி டிரம்புடன் அரசியல் ரீதியாக நெருக்கமாகக் கருதப்படும் வலதுசாரி அணிகளுக்கு ஏற்பட்ட பின்னடைவாகப் பார்க்கப்படுகிறது.

லூலா டா சில்வா இதற்கு முன்னர் 2003 முதல் 2011 வரை இரண்டு தொடர்ச்சியான பதவிக்காலங்களில் பிரேசிலின் ஜனாதிபதியாகப் பணியாற்றினார். பின்னர் 2023 ஆம் ஆண்டு மீண்டும் ஜனாதிபதியாகத் தெரிவாகி தனது மூன்றாவது பதவிக்காலத்தை ஆரம்பித்தார்.

தற்போதைய தேர்தல் வெற்றியின் மூலம் அவர் 2027 ஜனவரி 5 ஆம் திகதி நான்காவது முறையாக ஜனாதிபதி பதவியை ஏற்கவுள்ளார். இதன் மூலம் பிரேசிலின் அரசியல் வரலாற்றில் நான்கு முறை ஜனாதிபதியாகத் தெரிவான தலைவராக அவர் இடம்பெறுகிறார்.

இந்த வெற்றி, பிரேசிலின் உள்நாட்டுக் கொள்கைகள் மட்டுமன்றி, அமெரிக்காவுடனான வர்த்தக உறவுகள் மற்றும் இலத்தீன் அமெரிக்காவின் அரசியல் போக்கு ஆகியவற்றிலும் முக்கியத்துவம் வாய்ந்ததாகக் கருதப்படுகிறது.