பொலிஸ் பணிகளில் தலையிட்டதற்கும், குற்றவியல் அச்சுறுத்தல் விடுத்ததற்கும் தேசிய சுதந்திர முன்னணி கட்சியின் (ஜாதிக நிவஹல் பெரமுன) தலைவர் அமித் வீரசிங்கவை தடுப்புக் காவலில் வைக்க உத்தரவிடப்பட்டுள்ளது.
கண்டி பொலிஸ் தலைமையகத்தில் பொலிஸாரின் கடமைகளுக்கு இடையூறு விளைவித்த குற்றச்சாட்டில் கைது செய்யப்பட்ட அமித் வீரசிங்க, நீதிமன்றத்தில் ஆஜர்படுத்தப்பட்டார். இதன்போது, அவரை ஏப்ரல் 02 ஆம் திகதி வரை விளக்கமறியலில் வைக்குமாறு கண்டி பதில் நீதவான் தினேந்திர சேனரத்ன உத்தரவிட்டார்.
கண்டி பொலிஸ் தலைமையகத்தின் பிரதான பொலிஸ் பரிசோதகர் ரசிக சம்பத் பத்திரன, சந்தேக நபரை நீதிமன்றத்தில் ஆஜர்படுத்தினார்.
விளக்கமறியலில் வைக்கப்பட்டுள்ள அமித் வீரசிங்க, கடந்த காலத்தில் கண்டி பகுதியில் இயங்கி வந்த ‘மகாசோஹோன் பலகய’ என்ற அரசியல் இயக்கத்தை நடத்தி வந்தவர். மேலும், திகன கலவரத்தின் போது அதிகம் பேசப்பட்ட ஒருவராகவும் அறியப்படுகிறார்.
கண்டி தலைமைக் பொலிஸ் நிலையத்தில், ஒரு இளம் பெண் அளித்த புகாரை விசாரித்துக் கொண்டிருந்தபோது, பொலிஸ் அதிகாரிகளின் கடமைகளுக்கு தொடர்ந்து இடையூறு விளைவித்ததாக கூறி அவர் கைது செய்யப்பட்டார்.
கண்டி தலைமைக் பொலிஸ் நிலையத்தின் பொறுப்பாசிரியரான பிரதான பொலிஸ் பரிசோதகர் ரசிக்கா சம்பத்தின் வழிகாட்டுதலின் கீழ், கண்டி பிரதேச சிறுவர் மற்றும் மகளிர் பணியகத்தின் பொறுப்பதிகாரி பிரதான பொலிஸ் பரிசோதகர் நிலுகா பாலிபான உள்ளிட்ட அதிகாரிகள் குழு மேலதிக விசாரணைகளில் ஈடுபட்டு வருகின்றனர்.
