பெருந் தோட்டக் குடும்பங்களுக்கு நிலம் வழங்குமாறு கோரிக்கைகள் முன்வைக்கப்பட்ட போது, மலையகப் பகுதியில் நிலம் இல்லை என்றும், நிலங்களை இணைந்து தேடலாம் என்றும் ஜனாதிபதி அநுரகுமார திஸாநாயக்க நுவரெலியா மாவட்ட ஒருங்கிணைப்பு குழு கூட்டத்தில் தெரிவித்தார். நாட்டின் தலைவராக, அனைத்து மக்களினதும் நலன் மற்றும் உரிமைகளை பாதுகாப்பது அரசியலமைப்பிற்கமைய ஜனாதிபதியின் கடமையாகும். நிலம் இல்லை என்று கூறி பொறுப்பை வேறு திசைக்கு மாற்றி தமது கடமையிலிருந்து விலக முடியாது என கண்டி – சமூக அபிவிருத்தி நிறுவகத்தின் நிறைவேற்றுப்பணிப்பாளர் பெ.முத்துலிங்கம் தெரித்தார்.

கொழும்பு – குளோபல் டவர் ஹோட்டலில் திங்கட்கிழமை (22) இடம்பெற்ற ஊடகவியலாளர் மாநாட்டின் போதே அவர் இதனைத் தெரிவித்தார்.

அவர் மேலும் குறிப்பிடுகையில்,

தித்வா புயல், நாடெங்கும் முன்னெப்போதும் இல்லாத அளவிலான அழிவுகளை ஏற்படுத்தியது. இதனால் நேரடியாக 524,188 குடும்பங்களும், 1,812,311 தனி நபர்களும் பாதிக்கப்பட்டுள்ளனர். இதற்கு மேலாக பலர் மறைமுகமாகவும் பாதிக்கப்பட்டுள்ளனர். மிகவும் கடுமையாக பாதிக்கப்பட்ட மாவட்டங்களாக பதுளை, கண்டி, நுவரெலியா மற்றும் மாத்தனை ஆகியவை காணப்படுகின்றன. இம்மாவட்டங்களில் மாத்திரம் 21 சதவீதமான குடும்பங்கள் பாதிக்கப்பட்டுள்ளன.

மேலும் கவலைக்குரிய விடயமாக, பதிவான மரணங்களின் 69 சதவீதமானவையும், காணாமல் போளவர்களின் 72 சதவீதமானவையும், முற்றாக அழிந்த வீடுகளின் 55 சதவீதமானவையும், மற்றும் பகுதியளவில் சேதமடைந்த வீடுகளின் 33 சதவீதமானவையும் இந்த மாவட்டங்களிலிருந்தே பதிவாகியுள்ளன.

அனர்த்தத்துக்கு பின்னரான உடனடி காலகட்டத்தில், அரசாங்கம், சிவில் சமூக அமைப்புகள், தொண்டு நிறுவனங்கள் மற்றும் சர்வதேச சமூகத்தினர் இணைந்து மீட்பு நடவடிக்கைகள், அவசர தங்குமிடங்கள் மற்றும் உணவு உதவிகள் மூலம் பாராட்டத்தக்க ஆதரவை வழங்கினர். ஆனால் தற்போது, பாதிக்கப்பட்ட சமூகங்கள் பாதுகாப்பான மீள்குடியேற்றத்தையும், நிலையான வாழ்வாதாரத் தீர்வுகளையும் அவசரமாக கோருகின்றனர்.

இந்தச் சூழலில், பாதிக்கப்பட்ட மக்களுடன் தெருக்கமாக செயல்படும் சிவில் சமூக அமைப்புகள், வரலாற்று ரீதியாக புறக்கணிக்கப்பட்ட மலையகத் தமிழ் தோட்டத் தொழிலாளர் சமூகத்தின் மீது சிறப்பு கவனம் செலுத்த வேண்டிய அவசியத்தை வலியுறுத்துகின்றன.

ஏனெனில், புயலால் அவர்களின் பாதிப்புகள் மேலும் தீவிரமடைந்துள்ளன. அனர்த்தத்திற்குப் பின்னர், ஜனாதிபதி அநுரகுமார திஸாநாயக்க அனைத்து பாதிக்கப்பட்ட மாவட்டங்களையும் பார்வையிட்டு, வீடுகளை இழந்த குடும்பங்களுக்கு இழப்பீடு வழங்கவும், நிலம் மற்றும் வீடமைப்பு மானியங்களை விடுவிக்கவும் அதிகாரிகளுக்கு அறிவுறுத்தியுள்ளார்.

நுவரெலியா மாவட்டத்தில் உரையாற்றிய போது, மலையகப் பகுதிகளில் உள்ள 611 வீதிகள் தனியார் தோட்ட நிறுவனங்களின் கட்டுப்பாட்டில் உள்ளதாகவும், அவற்றை உள்ளுராட்சி அதிகாரத்தின் கீழ் கொண்டு வர நடவடிக்கை எடுக்கப்பட வேண்டும் என்றும் அவர் தெரிவித்தார்.

மேலும், பாராளுமன்ற உறுப்பினர் மனோ கணேசன், தோட்டக் குடும்பங்களுக்கு நிலம் வழங்குமாறு கோரிய போது, மலையகப் பகுதியில் நிலம் இல்லை என்றும், நிலங்களை இணைந்து தேடலாம் என்றும் ஜனாதிபதி தெரிவித்தார். தித்வா புயலால் மிகவும் பாதிக்கப்பட்ட பதுளை, கண்டி, மாத்தளை மற்றும் நுவரெலியா மாவட்டங்கள் பெரும்பாலும் தோட்டப் பகுதிகளாகும் என்பதும், அதிகம் பாதிக்கப்பட்டவர்கள் தோட்டத் தொழிலாளர் குடும்பங்களே என்பதும் குறிப்பிடத்தக்கது.

நாட்டின் தலைவராக, அனைத்து மக்களினதும் நலன் மற்றும் உரிமைகளை பாதுகாப்பது அரசியலமைப்பிற்கமைய ஜனாதிபதியின் கடமையாகும். நிலம் இல்லை என்று கூறி அல்லது பொறுப்பை வேறு திசைக்கு மாற்றி தமது கடமையிலிருந்து விலக முடியாது குறிப்பாக முன்பு வழங்கப்பட்ட பொது உறுதிமொழிகளை புறக்கணிக்கலாகாது.

ஜனாதிபதியாக பதவி ஏற்கும்முன், ‘ஒரு குடிமகனுக்கு நிலம் இல்லையெனில் குடியுரிமையின் பயன் என்ன?’ என்று அவர் கேள்வி எழுப்பியிருந்தார். மேலும், தேசிய மக்கள் சக்தியின் ஹட்டன் பிரகடனத்தில், மலையகத் தமிழ் சமூகத்தின் பிரதான பிரச்சினை வீடமைப்பு நெருக்கடியே. மக்கள் கணக்கெடுப்பு மற்றும் புள்ளிவிபரத் திணைக்களம் (2012ஃ2013) வெளியிட்ட தகவலின்படி, 67.8 சதவீதமான மலையகத் தமிழர்கள் இன்னும் லயன் வீடுகளிலேயே வசிக்கின்றனர்.’ எனக்குறிப்பிட்டுள்ளது.

மேலும் அப்பிரகடனத்தில், வாழத் தகுந்த வீடுகளை உறுதி செய்ய தேசிய வீடமைப்பு திட்டத்தை அமுல்படுத்துதல், தோட்ட தொழிலை விட்டு வெளியேறும் தொழிலாளர்களை வெளியேற்றுவதைத் தடுத்தல், தங்களின் சொந்த வளங்களை பயன்படுத்தி வீடுகள் கட்டிய குடும்பங்களுக்கு சட்டபூர்வ நில உரிமைப் பத்திரங்கள் வழங்குதல், மலையக மக்களுக்கு மட்டுமல்லாமல், பிற பகுதிகளில் குடியேறியவர்களுக்கும் நில உரிமைகளை உறுதி செய்தல், பயிரிடப்படாத மற்றும் கைவிடப்பட்ட தோட்ட நிலங்களை இளைஞர்களின் வாழ்வாதார மேம்பாட்டிற்கு பயன்படுத்துதல் உள்ளிட்ட வாக்குறுதிகள் முன்வைக்கப்பட்டுள்ளன.