நாட்டில் பெய்துவரும் அசாதாரண கனமழையின் தாக்கத்தால் மூதூர் பிரதேச செயலாளர் பிரிவுக்குட்பட்ட பல பகுதிகள் இன்று ஞாயிற்றுக்கிழமை (30) முழுமையாக வெள்ளத்தில் மூழ்கியுள்ளன.
இதன்போது திடீரென அதிகரித்த நீர்மட்டம் காரணமாக மக்கள் வீடுகளை விட்டு வெளியேற வேண்டிய சூழ்நிலை உருவாகியுள்ளது.
இந்நிலையில் மூதூரில் பெரும்பாலான பகுதி நீரில் மூழ்கியுள்ளதாக தெரியவருகிறது.
திருகோணமலை மட்டக்களப்பு பிரதான வீதி, ஜாயா வீதி, அரபிக் கல்லூரி வீதி, சாபிநகர், கைதரியா நகர், இறால் குழி, தோப்பூர், கங்குவேலி, கட்டை பரிச்சான், ஆனைச்சேனை, பாலர் நகர், ஆலிம் நகர், ஜின்னா நகர் அறபா நகர், அரபுக் கல்லூரி வீதி, ரைஸ் மில் மணிக்கூட்டு கோபுர சந்தி உள்ளிட்ட பல பகுதிகள் கடுமையான வெள்ளத்தால் பாதிக்கப்பட்டுள்ளன. இப்பகுதிகளில் வீடுகள், சாலைகள் மற்றும் பொதுக் கட்டடங்கள் தண்ணீரில் மூழ்கியுள்ளதால் பல்வேறு அத்தியாவசிய சேவைகளும் பாதிக்கப்பட்டுள்ளது.
மேலும், பெரும் பரப்பளவில் பரவியுள்ள விவசாய நிலங்களும் நீரில் மூழ்கியதால் பயிர் சேதம் அதிகரிக்க வாய்ப்புள்ளதாக விவசாயிகள் கவலை தெரிவித்து வருகின்றனர்.
வெள்ளம் அதிகரித்ததையடுத்து, தங்கள் வீடுகளில் தங்க முடியாத நிலையில் பல குடும்பங்கள் தற்போது தங்கள் உறவினரின் வீடுகளிலும் பாதுகாப்பான இடங்களிலும் தஞ்சமடைந்துள்ளதாக தெரியவருகிறது.
