அரசுக்குச் சொந்தமான சிட்கோ நிலத்தை போலி ஆவணங்கள் மூலமாக அபகரித்ததாக பதியப்பட்ட வழக்கில் திமுக முன்னாள் அமைச்சர் மா.சுப்பிரமணியன் மற்றும் அவரது மனைவிக்கு எதிராக சிறப்பு நீதிமன்றத்தில் குற்றச்சாட்டு பதிவு செய்யப்பட்டுள்ளது.
சென்னை கிண்டி தொழிலாளர் காலனியில் எஸ்.கே.கண்ணன் என்பவருக்கு சிட்கோ சார்பில் ஒதுக்கீடு செய்யப்பட்ட நிலத்தை, திமுக முன்னாள் அமைச்சர் மா.சுப்பிரமணியன், சென்னை மாநகராட்சி மேயராகப் பதவி வகித்தபோது தனது அதிகாரத்தை தவறாகப் பயன்படுத்தி போலி ஆவணங்கள் மூலமாக தனது மனைவி காஞ்சனா பெயருக்கு மாற்றியுள்ளதாக குற்றச்சாட்டு எழுந்தது.
சிபிசிஐடி வழக்குப்பதிவு: இதுதொடர்பாக சைதாப்பேட்டையைச் சேர்ந்த பார்த்திபன் என்பவர், சென்னை உயர் நீதிமன்றத்தில் மனு தாக்கல் செய்திருந்தார். அதையடுத்து உயர் நீதிமன்ற உத்தரவுப்படி, இதுதொடர்பாக மா.சுப்பிர மணியன் மற்றும் அவரது மனைவி காஞ்சனா ஆகியோர் மீது கூட்டுச்சதி, மோசடி மற்றும் ஊழல் தடுப்புச்சட்டத்தின் கீழ் சிபிசிஐடி போலீஸார் வழக்குப்பதிவு செய்தனர்.
