அமெரிக்கா, சர்வதேச குற்றவியல் நீதிமன்றத்தின் (ICC) மேலும் இரண்டு நீதிபதிகள் மீது தடைகள் விதித்ததை பிரான்ஸ் கடுமையாக கண்டித்துள்ளது.
இதற்கு முன், அமெரிக்கா ஏற்கனவே 9 நீதிபதிகள் மீது நடவடிக்கை எடுத்திருந்தது.
பிரான்ஸ் வெளியுறவு அமைச்சகம், “சர்வதேச குற்றவியல் நீதிமன்றம், அதன் பணியாளர்கள் மற்றும் நீதிமன்றத்தை ஆதரிக்கும் சமூக அமைப்புகள் மீது எந்தவிதமான மிரட்டலையும், அழுத்தத்தையும் கொடுப்பதை ஏற்க முடியாது” என தெரிவித்துள்ளது.
இந்த தடைகள், நீதித்துறையின் சுயாதீனத்துக்கு எதிரான தாக்குதல் என்றும், ரோம் சட்டத்தில் (Rome Statute) இணைந்த 125 நாடுகளின் உரிமைகளுக்கு எதிரானது என்றும் பிரான்ஸ் வலியுறுத்தியுள்ளது.
பிரான்ஸ், இந்த முடிவால் பாதிக்கப்பட்ட நீதிபதிகளுக்கு ஆதரவு தெரிவித்துள்ளது.
இஸ்ரேல் பிரதமர் பெஞ்சமின் நேதன்யாகு மற்றும் முன்னாள் பாதுகாப்பு அமைச்சர் யோவ் கல்லன்ட் மீது காசா பகுதியில் நடந்த போர் குற்றங்கள் மற்றும் மனிதத்தன்மைக்கு எதிரான குற்றங்கள் தொடர்பாக கைது வாரண்ட் பிறப்பித்ததற்காக அமெரிக்கா, ICC அதிகாரிகள் மீது தடைகள் விதித்தது.
பிரான்ஸ் மட்டுமல்லாமல், பல ஐரோப்பிய நாடுகளும், சர்வதேச குற்றவியல் நீதிமன்றத்தின் சுயாதீனத்தை காக்க வேண்டும் என வலியுறுத்துகின்றன.
பிரான்ஸ், “சர்வதேச குற்றவியல் நீதிமன்றம் தனது பொறுப்புகளை அரசியல் அழுத்தமின்றி நிறைவேற்ற வேண்டும்” எனக் கூறி, அமெரிக்காவை அனைத்து தடைகளையும் திரும்பப் பெற அழைத்துள்ளது.
