இவ் விடயத்தின் பாரதூரமான தன்மையைக் கருத்திற் கொண்டு கடந்த 2026.04.07 அன்று என்னால் நாடாளுமன்றத்தில் சபையின் கவனத்துக்குக் கொண்டுவரப்பட்டதுடன் பாதிக்கப்பட்ட மக்களின் குமுறல்களையும் சபையில் பதிவு செய்திருந்தேன். தொடர்ந்து அன்றையதினம் மாலை-02 மணிக்குத் தங்களின் தலைமையில் பாராளுமன்றக் குழு அறை- 01 இல் நடைபெற்ற பாதுகாப்பு அமைச்சுத் தொடர்பான அமைச்சு சார் ஆலோசனைக் கூட்டத்திலும் இக் காணி விடயம் தொடர்பில் தங்களுக்குத் தெளிவாக விளக்கப்படுத்தப்பட்டிருந்தது. “மக்களின் நிலம் மக்களுக்கே” என்ற உயரிய கொள்கையின் அடிப்படையில் நின்றும், மக்களின் நலன் சார்ந்தும் செயற்பட்டு வரும் தாங்கள் தமிழ்மக்களின் இப் பூர்வீக சொந்த நிலத்தை விடுவிப்பீர்கள் என்ற மிகுந்த நம்பிக்கையினை மக்கள் கொண்டுள்ளனர். தமது சொந்த நிலங்களை இழந்து தற்போது வாழ்வாதாரத்துக்காகக் கையேந்தி நிற்கும் நிலைக்குத் தள்ளப்பட்டுள்ள இம் மக்களுக்கு அறத்தின் பாற்பட்ட நீதி வழங்கப்பட வேண்டும் என்பது எமது எதிர்பார்ப்பாகும்.

எனவே, இக் காணிகளின் பூர்வீக உரிமையாளர்களான தமிழ்ப் பொது மக்களின் நிலங்களை வலுக்கட்டாயமாகச் சுவீகரிக்க எடுக்கும் முயற்சியைத் தடுத்து நிறுத்திக் காணியின் உண்மையான உரிமையாளர்களான தமிழ்ப் பொதுமக்களிடமே இக் காணியினை வழங்க ஏற்பாடு செய்யுமாறு தங்களைத் தயவுடன் கேட்டுக்கொள்கின்றேன் எனவும் குறிப்பிடப்பட்டுள்ளது.