நாட்டில் அனர்த்தத்தில் சிக்கிய வெளிநாட்டவர்களை இந்திய ஹெலிக்கொப்டர் மூலம் இலங்கை விமானப்படையினர் மீட்டுள்ளனர்.
இன்று (30) இந்திய அரசினால் மீட்புப் பணிகளுக்காக வழங்கப்பட்ட இந்திய விமானப்படையின் MI 17 (Indian Ac) ஹெலிக்கொப்டர் மூலம் இவர்கள் மீட்கப்பட்டுள்ளதாக தெரிவிக்கப்படுகிறது.
ரம்போடை பகுதியில் அனர்த்த நிலைமையில் சிக்கித் தவித்த இந்தியா, தென்னாபிரிக்கா, ஜெர்மனி, இங்கிலாந்து மற்றும் ஸ்லோவாக்கியா முதலான நாடுகளைச் சேர்ந்த சுற்றுலாப் பயணிகளே இதன்போது மீட்கப்பட்டுள்ளனர்.
இந்நிலையில், வெளிநாட்டலுவல்கள், வெளிநாட்டு வேலைவாய்ப்பு மற்றும் சுற்றுலா அமைச்சர் விஜித ஹேரத், சுற்றுலாப் பயணிகளின் நலன் தொடர்பாக விசாரித்தார்.
சுற்றுலாப் பயணிகளுக்கான தங்குமிடம், போக்குவரத்து மற்றும் பிற வசதிகளுக்கான ஏற்பாடுகளை அமைச்சு முன்னெடுக்கவுள்ளமை குறிப்பிடத்தக்கது.
