அமெரிக்கா–இஸ்ரேல் தாக்குதல்களின் பின்னணியில், ஈரானின் உச்சத் தலைவர் ஆயத்துல்லா அலி கமேனி உயிரிழந்த நிலையில், அவரது இரண்டாவது மகனான மொஜ்தபா கமேனி (Mojtaba Khamenei) ஈரானின் புதிய உச்ச தலைவராக தெரிவு செய்யப்பட்டுள்ளதாக ஈரானிய அரச ஊடகங்கள் தகவல் வெளியிட்டுள்ளன.
இந்த தகவலின்படி, அமெரிக்கா மற்றும் இஸ்ரேல் மேற்கொண்ட தாக்குதலின் முதல் நாளிலேயே முன்னாள் உச்சத் தலைவர் ஆயத்துல்லா அலி கமேனி (Ali Khamenei) உயிரிழந்ததாக தெரிவிக்கப்படுகிறது. அந்த தாக்குதலில் அவரது மனைவி, மனைவியின் குடும்ப உறுப்பினர்கள் மற்றும் ஒரு மகளும் உயிரிழந்ததாக கூறப்படுகின்றது.
அதே நேரத்தில், 56 வயதான மொஜ்தபா கமேனி அந்த தாக்குதலில் இருந்து உயிர் தப்பியதாக தகவல்கள் வெளியாகியுள்ளன.
ஈரானின் அரசியல் மற்றும் இராணுவ தலைவர்கள் பலரும் மொஜ்தபா கமேனிக்கு ஆதரவு தெரிவித்துள்ளதாகவும், அவரை நாட்டின் புதிய உச்சத் தலைவராக ஏற்றுக்கொண்டுள்ளதாகவும் அரச ஊடகங்கள் தெரிவித்துள்ளன.
ஈரானில் உச்ச தலைவர் பதவி நாட்டின் மிக உயர்ந்த அதிகார மையமாகும். இந்த பதவியை வகிப்பவர் நாட்டின் அரசியல், பாதுகாப்பு மற்றும் மதத் துறைகளில் முக்கியமான தீர்மானங்களை எடுக்கக் கூடிய அதிகாரத்தை பெற்றிருப்பார். மேலும், ஆயுதப்படைகள் மற்றும் பாதுகாப்பு அமைப்புகள் அனைத்திற்கும் இறுதி கட்டுப்பாடு உச்சத் தலைவரிடமே இருக்கும்.
மொஜ்தபா கமேனி, ஈரானின் சக்திவாய்ந்த இராணுவ அமைப்பான இஸ்லாமிய புரட்சிகர காவல்படை (Islamic Revolutionary Guard Corps) உடன் நெருங்கிய தொடர்பு கொண்டவர் என அரசியல் ஆய்வாளர்கள் குறிப்பிடுகின்றனர்.
அவர் பொதுவாக வெளிப்படையான அரசியல் வாழ்க்கையில் அதிகம் தோன்றாதவர் என்றாலும், தனது தந்தையின் நெருங்கிய ஆலோசகராக பின்னணியில் செல்வாக்கு மிக்கவராக இருந்ததாக கூறப்படுகிறது. பல ஆண்டுகளாகவே அவர் தனது தந்தையின் வாரிசாக வரக்கூடும் என்ற எதிர்பார்ப்பு அரசியல் வட்டாரங்களில் நிலவி வந்தது.
அமெரிக்கா – இஸ்ரேல் – ஈரான் மோதல் சூழலில் இந்த அதிகார மாற்றம் இடம்பெற்றுள்ளதால், பிராந்திய மற்றும் உலகளாவிய பாதுகாப்பு சூழ்நிலைக்கு இது புதிய திருப்பத்தை ஏற்படுத்தக்கூடும் என அரசியல் வட்டாரங்கள் கூறுகின்றன.
மொஜ்தபா கமேனி உச்சத் தலைவராக தெரிவு செய்யப்பட்டுள்ள நிலையில், ஈரானின் இராணுவ மற்றும் அரசியல் கொள்கைகள் மேலும் கடுமையான பாதையில் செல்லக்கூடும் என நிபுணர்கள் கருதுகின்றனர். குறிப்பாக அமெரிக்கா மற்றும் இஸ்ரேலுடன் நடைபெற்று வரும் பதற்ற சூழலில், ஈரானின் நடவடிக்கைகள் உலக அரசியல் நிலைமையில் பெரும் தாக்கத்தை ஏற்படுத்தக்கூடும் என எதிர்பார்க்கப்படுகிறது.
இந்நிலையில், சர்வதேச சமூகம் இந்த அரசியல் மாற்றத்தை கவனமாகப் பின்தொடர்ந்து வருகிறது.
