“அதிமுகவை உடைக்க வேண்டும் என திமுக பல அவதாரம் எடுத்தபோல், பாமகவை உடைக்க எடுத்த முயற்சியை அன்புமணி தவிடு பொடியாக்கினார். அதிமுக மற்றும் பாமகவை வீழ்த்த முடியாது” என அதிமுக பொதுச் செயலாளர் பழனிசாமி தெரிவித்துள்ளார்.
தமிழகம் முழுவதும் அதிமுக மற்றும் கூட்டணி சார்பில் போட்டியிடும் வேட்பாளர்களை ஆதரித்து அதிமுக பொதுச் செயலாளர் பழனிசாமி சூறாவளி தேர்தல் பிரச்சார சுற்றுப்பயணம் மேற்கொண்டார்.
இதனைத் தொடர்ந்து, தனது சொந்த தொகுதியான எடப்பாடி சட்டப்பேரவை தொகுதியில் ஜலகண்டாபுரம், செட்டிமாங்குறிச்சி, எடப்பாடி, கொங்கணாபுரம் ஆகிய 4 இடங்களில் இன்று அவர் தீவிர பிரச்சாரத்தில் ஈடுபட்டார். இதனிடையே, ஜலகண்டபுரத்தில் நடந்த பிரச்சாரத்தில் அதிமுக பொதுச்செயலாளர் பழனிசாமியுடன் பாமக தலைவர் அன்புமணி கலந்து கொண்டார்.
